اسلام آباد (ایم این این): پاکستان میں جاپان کے سفیر اکاماتسو شوئیچی نے بدھ، 21 اکتوبر 2026 کو ترنول اسلام آباد میں ٹائن گرلز ماڈل پرائمری اسکول کا افتتاح کر دیا۔ اسکول کی تعمیر جاپان کی حکومت کے مالی تعاون سے مکمل کی گئی ہے، جس کا مقصد لڑکیوں کے لیے معیاری تعلیم تک رسائی بہتر بنانا ہے۔
یہ منصوبہ کمیونٹی سروسز پروگرام (سی ایس پی) نامی غیر سرکاری تنظیم نے مکمل کیا، جو پاکستان بھر میں پسماندہ اور کمزور طبقات کی فلاح و بہبود کے لیے تعلیم، صحت، صاف پانی کی فراہمی اور خواتین کو بااختیار بنانے کے شعبوں میں کام کرتی ہے۔
جاپان کی حکومت نے گرانٹ اسسٹنس فار گراس روٹس ہیومن سکیورٹی پراجیکٹس (جی جی پی) پروگرام کے تحت اس منصوبے کے لیے 44,025 امریکی ڈالر فراہم کیے۔ افتتاحی تقریب میں جاپانی سفارت خانے کے حکام، سی ایس پی کے نمائندوں، اساتذہ، طلبہ، والدین اور مقامی کمیونٹی کے افراد نے شرکت کی۔
نئے تعمیر شدہ اسکول میں آٹھ کلاس رومز، پرنسپل کا دفتر، واش رومز، ہموار کھیل کا میدان اور طلبہ کے لیے 250 کرسیاں فراہم کی گئی ہیں۔ جاپانی حکومت کی مالی معاونت کے علاوہ سی ایس پی نے بھی اضافی وسائل فراہم کیے، جن کے ذریعے شمسی توانائی کا نظام، زیرِ زمین پانی ذخیرہ کرنے کی ٹینکی، بجلی سے چلنے والا واٹر کولر اور ڈیجیٹل تعلیم کے لیے انٹرایکٹو اسمارٹ بورڈ نصب کیا گیا۔
یہ اسکول ترنول میں لڑکیوں کے لیے بہتر تعلیمی سہولیات کی ضرورت کو پورا کرنے کی جانب ایک اہم قدم ہے، جہاں بہت سی بچیوں کو تعلیم کے حصول میں مشکلات کا سامنا ہے۔ اسکول میں اس وقت 240 طالبات زیرِ تعلیم ہیں، جبکہ یہاں 250 طالبات کے لیے گنجائش موجود ہے۔ نئی عمارت بچیوں کو محفوظ، آرام دہ اور جدید تعلیمی ماحول فراہم کرے گی۔
تقریب سے خطاب کرتے ہوئے جاپانی سفیر اکاماتسو شوئیچی نے مشکل موسمی حالات کے باوجود منصوبہ کامیابی سے مکمل کرنے پر سی ایس پی کو مبارک باد دی۔ انہوں نے کہا کہ تعلیم نہ صرف بنیادی انسانی حق ہے بلکہ انسانی تحفظ کا ایک اہم ستون اور بہتر و خوشحال معاشرے کی تعمیر کی بنیاد بھی ہے۔
سفیر نے پاکستان کے مستقبل کے لیے بالخصوص لڑکیوں کی تعلیم کی اہمیت پر زور دیتے ہوئے کہا کہ پاکستان میں جاپان کے ترقیاتی تعاون میں تعلیم کو بنیادی ترجیح حاصل ہے۔
انہوں نے پاکستان کی پائیدار ترقی کے لیے جاپان کی مسلسل معاونت کے عزم کا اعادہ کیا اور امید ظاہر کی کہ یہ اسکول پاکستان اور جاپان کے درمیان دیرینہ دوستی اور تعاون کی ایک پائیدار علامت ثابت ہوگا۔
