اسلام آباد (MNN): پاکستان میں جاپان کے سفیر اکاماتسو شوچی نے 24 ستمبر کو پہلی مرتبہ بحریہ یونیورسٹی اسلام آباد کیمپس کا دورہ کیا، جہاں انہوں نے ریکٹر بحریہ یونیورسٹی وائس ایڈمرل عابد حمید ہلالِ امتیاز (ملٹری) سے ملاقات کی اور پاکستان اور جاپان کے درمیان مزید تعاون کے امکانات پر تبادلہ خیال کیا۔
بعد ازاں جاپانی سفیر نے یونیورسٹی میں منعقدہ کتابوں کی حوالگی کی تقریب میں شرکت کی اور ”ریڈ جاپان پروجیکٹ“ (READ JAPAN PROJECT) کے تحت بحریہ یونیورسٹی کو تقریباً 100 کتب پیش کیں۔ یہ منصوبہ 2008 میں نپون فاؤنڈیشن نے شروع کیا تھا اور اس وقت ٹوکیو فاؤنڈیشن کے زیرانتظام ہے، جس کا مقصد کتب اور ادب کے ذریعے دنیا بھر میں جاپان کے بارے میں بہتر فہم پیدا کرنا ہے۔
بحریہ یونیورسٹی کی جانب سے منتخب کی گئی کتب انگریزی زبان میں ہیں، جن میں جاپان کی تاریخ، سیاست، معیشت، سلامتی، بین الاقوامی تعلقات، فلسفہ، ادب، زبان اور ثقافت سمیت مختلف موضوعات کا احاطہ کیا گیا ہے۔
تقریب سے خطاب کرتے ہوئے سفیر اکاماتسو نے طلبہ اور اساتذہ کو مبارکباد دی اور کتب کے اس مجموعے کو ”علم کے پل“ قرار دیا۔ انہوں نے امید ظاہر کی کہ بحریہ یونیورسٹی کے طلبہ ان مواقع سے بھرپور فائدہ اٹھائیں گے اور مستقبل میں پاکستان اور جاپان کے درمیان تعلقات کو مضبوط بنانے والے نئے روابط کا ذریعہ بنیں گے۔
جاپانی سفیر نے پاکستان کے نوجوانوں میں جاپان کے حوالے سے بڑھتی ہوئی دلچسپی کو بھی سراہا۔ انہوں نے آئندہ سال پاکستان اور جاپان کے درمیان سفارتی تعلقات کے قیام کی 75ویں سالگرہ کا حوالہ دیتے ہوئے امید ظاہر کی کہ یہ کتب پاکستانی طلبہ کو جاپان کی ثقافت، معاشرے اور سماجی و اقتصادی ترقی کو سمجھنے میں مدد دیں گی۔
سفیر اکاماتسو نے پاکستان کے ساتھ جاپان کے طویل عرصے سے جاری اقتصادی تعاون کا ذکر کرتے ہوئے کہا کہ جاپان نے ہمیشہ تعلیم اور خودمختاری کے احترام کو خصوصی اہمیت دی ہے۔ انہوں نے دونوں ممالک کے عوام کے درمیان روابط اور تبادلوں کے فروغ میں بحریہ یونیورسٹی کے تعاون کو بھی سراہا۔
بحریہ یونیورسٹی کی جانب سے اسلام آباد کیمپس کے ڈائریکٹر جنرل ریئر ایڈمرل نعیم سرور ستارۂ امتیاز (ملٹری) نے نپون فاؤنڈیشن اور جاپانی سفارتخانے کا شکریہ ادا کیا۔ انہوں نے کہا کہ کتب کا یہ عطیہ طلبہ کو جاپان کے بارے میں بہتر معلومات حاصل کرنے میں مدد دے گا اور پاکستان اور جاپان کے تعلقات کو مزید مضبوط بنانے کی راہ ہموار کرے گا۔
”ریڈ جاپان پروجیکٹ“ کا آغاز نپون فاؤنڈیشن نے 2008 میں کیا تھا، جس کا مقصد دنیا بھر کے تحقیقی اداروں، جامعات اور کتب خانوں کو جاپان سے متعلق انگریزی زبان کی کتب فراہم کرکے جاپان کے بارے میں عالمی سطح پر آگاہی اور فہم کو فروغ دینا ہے۔
