اسلام آباد (ایم این این): پاکستان محکمہ موسمیات (پی ایم ڈی) نے آئندہ تین سے چار روز کے لیے ملک گیر موسمی الرٹ جاری کرتے ہوئے جنوبی اور وسطی پاکستان سمیت مختلف علاقوں میں مون سون کی شدید بارشوں، گرج چمک اور بعض مقامات پر موسلادھار بارش کی پیشگوئی کی ہے۔
محکمہ موسمیات کے مطابق جنوب مغربی راجستھان اور ملحقہ علاقوں میں موجود کم دباؤ کے باعث مون سون ہوائیں مزید متحرک ہوگئی ہیں، جس کے نتیجے میں 25 سے 28 جولائی کے دوران ملک کے مختلف حصوں میں بارش کا امکان ہے۔
صوبوں میں بارش کی پیشگوئی
سندھ کے اضلاع تھرپارکر، عمرکوٹ، میرپورخاص، بدین، سانگھڑ، حیدرآباد، مٹیاری، جامشورو، شہید بینظیر آباد، گھوٹکی، کشمور، جیکب آباد، شکارپور، سکھر، لاڑکانہ، خیرپور، نوشہروفیروز، ٹھٹھہ اور دیگر علاقوں میں گرج چمک کے ساتھ بارش اور بعض مقامات پر موسلادھار بارش متوقع ہے، جبکہ کراچی میں ابر آلود موسم کے ساتھ ہلکی بارش کا امکان ظاہر کیا گیا ہے۔
پنجاب میں لاہور، شیخوپورہ، اوکاڑہ، ساہیوال، پاکپتن، وہاڑی، خانیوال، ملتان، ڈیرہ غازی خان، راجن پور، کوٹ ادو، مظفرگڑھ، بہاولپور، بہاولنگر، رحیم یار خان سمیت متعدد اضلاع میں تیز ہواؤں اور گرج چمک کے ساتھ بارش کی پیشگوئی کی گئی ہے۔ اسلام آباد، راولپنڈی، مری، گلیات اور بالائی پنجاب کے مختلف علاقوں میں بھی وقفے وقفے سے بارش متوقع ہے۔
خیبرپختونخوا میں پشاور، مردان، سوات، چترال، دیر، کوہستان، ایبٹ آباد، مانسہرہ، ہری پور، کوہاٹ، بنوں، ٹانک، ڈیرہ اسماعیل خان، کرم، وزیرستان، باجوڑ، مہمند اور خیبر سمیت مختلف اضلاع میں بارش اور گرج چمک کا امکان ہے۔
بلوچستان کے ژوب، شیرانی، لورالائی، کوہلو، سبی، نصیرآباد، جھل مگسی، جعفرآباد، بارکھان، ڈیرہ بگٹی، آواران اور خضدار میں بھی بارش اور چند مقامات پر شدید بارش کی پیشگوئی کی گئی ہے۔
اسی طرح گلگت بلتستان کے گلگت، اسکردو، ہنزہ، دیامر، استور، غذر، گانچھے اور شگر جبکہ آزاد کشمیر کے مظفرآباد، وادی نیلم، راولاکوٹ، باغ، حویلی، کوٹلی، بھمبر اور میرپور میں بھی بارش متوقع ہے۔
شہری سیلاب کا خدشہ
محکمہ موسمیات نے خبردار کیا ہے کہ لاہور، گوجرانوالہ، بہاولپور، رحیم یار خان، ملتان، فیصل آباد، سیالکوٹ، سکھر، حیدرآباد، شہید بینظیر آباد، ٹھٹھہ، بدین، سانگھڑ، خیرپور، مٹھی، میرپورخاص، عمرکوٹ، ٹنڈو محمد خان اور ٹنڈو الہ یار کے نشیبی علاقوں میں جمعہ سے اتوار کے دوران شہری سیلاب کی صورتحال پیدا ہو سکتی ہے۔
پی ایم ڈی نے مزید خبردار کیا کہ تیز ہوائیں اور آسمانی بجلی کمزور عمارتوں کو نقصان پہنچا سکتی ہیں، جبکہ سیاحوں، مسافروں اور کسانوں کو احتیاط برتنے، فصلوں اور مویشیوں کی حفاظت یقینی بنانے کی ہدایت کی گئی ہے۔
انتظامیہ ہائی الرٹ پر
محکمہ موسمیات نے تمام متعلقہ وفاقی، صوبائی اور ضلعی اداروں کو الرٹ رہنے کی ہدایت کی ہے۔
دریں اثنا، سندھ کے سینئر وزیر شرجیل انعام میمن نے کہا ہے کہ صوبے بھر میں متوقع شدید بارشوں کے پیش نظر تمام متعلقہ محکمے، ضلعی انتظامیہ، ریسکیو ادارے اور ایمرجنسی ٹیمیں ہائی الرٹ پر ہیں۔ انہوں نے بتایا کہ حساس علاقوں میں مشینری اور پانی نکالنے والے پمپ بھی تعینات کیے جا رہے ہیں، جبکہ شہریوں کو غیر ضروری سفر سے گریز کرنے کا مشورہ دیا گیا ہے۔
مون سون سے جانی و مالی نقصان
ملک میں جاری مون سون بارشوں کے باعث اب تک کم از کم 37 افراد جاں بحق ہو چکے ہیں، جبکہ خیبرپختونخوا، گلگت بلتستان، آزاد کشمیر اور پنجاب میں سیلاب، لینڈ سلائیڈنگ اور دیگر حادثات سے گھروں، فصلوں، مویشیوں اور سڑکوں کو بھی نقصان پہنچا ہے۔
لاہور میں رواں مون سون کی سب سے زیادہ 263 ملی میٹر بارش ریکارڈ کی گئی، جس سے شہر کی متعدد شاہراہیں زیر آب آگئیں اور معمولاتِ زندگی شدید متاثر ہوئے، جبکہ خیبرپختونخوا میں بارش سے متعلق واقعات میں جاں بحق افراد کی تعداد 20 تک پہنچ چکی ہے۔
ادھر وفاقی وزیر منصوبہ بندی احسن اقبال نے حال ہی میں نیشنل ایمرجنسیز آپریشن سینٹر (NEOC) کے اجلاس کی صدارت کرتے ہوئے مون سون کے دوران صوبائی تیاریوں، نکاسیٔ آب کے نظام اور امدادی اقدامات کا تفصیلی جائزہ لیا۔
