لندن (MNN)؛ انگلینڈ نے لارڈز میں کھیلے گئے دوسرے ٹیسٹ میں پاکستان کو 194 رنز سے شکست دے کر تین میچوں کی سیریز میں 2-0 کی ناقابلِ شکست برتری حاصل کرلی۔
پاکستان کو کامیابی کے لیے 389 رنز کا مشکل ہدف ملا تھا، تاہم پوری ٹیم 194 رنز پر آؤٹ ہوگئی۔ سعود شکیل نے شاندار مزاحمت کرتے ہوئے 97 رنز بنائے، لیکن ان کی اننگز پاکستان کو شکست سے نہ بچا سکی۔ انجری کے باعث اوپنر امام الحق دوسری اننگز میں بیٹنگ کے لیے میدان میں نہیں اترے۔
پاکستان کی ہدف کے تعاقب میں ابتدا ہی انتہائی خراب رہی۔ انگلینڈ کے فاسٹ بولر اولی رابنسن نے پانچویں اوور کی تیسری گیند پر اذان اویس کو 6 رنز پر ایل بی ڈبلیو کردیا اور اسی اوور کی آخری گیند پر عبداللہ شفیق کو صفر پر پویلین واپس بھیج دیا۔
اس کے بعد جوفرا آرچر نے کپتان بابر اعظم کو صرف 6 رنز پر آؤٹ کرکے پاکستان کا اسکور 7.1 اوورز میں 14 رنز پر تین وکٹ کردیا۔
سعود شکیل اور شان مسعود نے اس نازک صورتحال میں ذمہ دارانہ بیٹنگ کرتے ہوئے اننگز کو سنبھالا۔ شکیل نے مثبت انداز اپناتے ہوئے اپنی 11ویں ٹیسٹ نصف سنچری مکمل کی، جبکہ دونوں بلے بازوں نے چوتھی وکٹ کے لیے 97 رنز کی اہم شراکت قائم کی۔
تاہم رابنسن نے شان مسعود کو 26 رنز پر آؤٹ کرکے یہ شراکت توڑ دی۔ اس کے فوراً بعد انہوں نے محمد رضوان کو بھی ایک رن پر ایل بی ڈبلیو کرکے پاکستان کو مزید مشکل میں ڈال دیا۔ اس وقت پاکستان کا اسکور 32.5 اوورز میں 115 رنز پر پانچ وکٹ تھا۔
علی عثمان نے سعود شکیل کا ساتھ دیتے ہوئے 31 رنز کی شراکت قائم کی، لیکن آرچر نے انہیں 16 رنز پر آؤٹ کردیا۔
ایک جانب وکٹیں گرتی رہیں جبکہ دوسری جانب سعود شکیل نے بھرپور مزاحمت جاری رکھی اور اپنی پانچویں ٹیسٹ سنچری مکمل کرنے کی کوشش کی۔ تاہم جوش ٹنگ نے ان کی شاندار اننگز کا خاتمہ 97 رنز پر کردیا۔ شکیل نے 122 گیندوں کا سامنا کرتے ہوئے 13 چوکے اور دو چھکے لگائے۔
اس کے بعد ٹنگ نے خرم شہزاد کو 9 اور محمد علی کو 8 رنز پر آؤٹ کرکے انگلینڈ کی فتح پر مہر ثبت کردی۔
انگلینڈ کی جانب سے اولی رابنسن نے چار وکٹیں حاصل کیں، جبکہ جوش ٹنگ نے تین اور جوفرا آرچر نے دو وکٹیں لیں۔
اس سے قبل انگلینڈ نے دن کا آغاز اپنی دوسری اننگز میں 177 رنز سات کھلاڑی آؤٹ سے کیا اور پوری ٹیم 54.2 اوورز میں 208 رنز پر آؤٹ ہوگئی۔
پاکستان کی جانب سے محمد عباس نے شاندار باؤلنگ کرتے ہوئے اپنے ٹیسٹ کیریئر کی آٹھویں پانچ وکٹوں کی اننگز مکمل کی۔
سیریز کا تیسرا اور آخری ٹیسٹ 9 سے 13 ستمبر تک برمنگھم کے ایجبسٹن اسٹیڈیم میں کھیلا جائے گا۔
