پشاور (ایم این این); پشاور میں رومانیہ کے اعزازی قونصل خانے نے الخیر ایجوکیشن سینٹر میں چھت گرنے کے المناک واقعے میں اپنے پیاروں کو کھونے والے خاندانوں کی مدد کے لیے مالی امداد فراہم کی ہے۔
یہ افسوسناک واقعہ جمعرات 15 اکتوبر 2026 کو صبح کی کلاسوں کے دوران پیش آیا، جس میں کم از کم 34 اسکول کے بچے اور ایک خاتون ٹیچر جاں بحق ہوگئے۔
رومانیہ کے اعزازی قونصل خانے اور اعزازی قونصل مسعود احمد قاضی کی جانب سے جنرل منیجر عباس پرویز نے مالی امداد لیڈی ریڈنگ اسپتال پشاور کے ایڈمنسٹریٹر کے حوالے کی۔ امدادی رقم اسپتال انتظامیہ کے سپرد کی گئی تاکہ اس مشکل وقت میں سوگوار خاندانوں کی مدد کی جاسکے۔
پاکستان میں رومانیہ کے سفیر ڈاکٹر ڈین سٹوئینیسکو نے سانحے میں قیمتی جانوں، بالخصوص بڑی تعداد میں بچوں کی ہلاکت پر گہرے دکھ اور افسوس کا اظہار کیا۔
انہوں نے کہا کہ یہ بچے اپنے بستے اور مستقبل کے خواب لے کر اسکول گئے تھے، لیکن اب کبھی اپنے گھروں کو واپس نہیں آئیں گے۔ انہوں نے بچوں کے ساتھ جاں بحق ہونے والی خاتون ٹیچر کے انتقال پر بھی افسوس کا اظہار کیا۔
رومانیہ کے سفیر نے اپنے سفارت خانے کی جانب سے جاں بحق افراد کے والدین اور لواحقین سے دلی تعزیت کرتے ہوئے زخمیوں کے ساتھ بھی ہمدردی کا اظہار کیا اور ان کی جلد صحت یابی کی دعا کی۔
انہوں نے کہا کہ بچے کو کھونے کے دکھ کا مداوا کوئی الفاظ نہیں کرسکتے، تاہم امید ہے کہ متاثرہ خاندان اپنے اردگرد موجود لوگوں کی ہمدردی، دیکھ بھال اور تعاون سے حوصلہ حاصل کریں گے۔ انہوں نے اس مشکل گھڑی میں پشاور کے عوام کے ساتھ رومانیہ کی یکجہتی کا اعادہ کیا۔
پشاور میں رومانیہ کے اعزازی قونصل مسعود احمد قاضی نے کہا کہ اس سانحے نے پوری برادری کو شدید غمزدہ کردیا ہے۔
انہوں نے کہا کہ کسی بھی مالی امداد سے کسی عزیز کی جدائی کا نقصان پورا نہیں ہوسکتا، تاہم یہ تعاون ان خاندانوں کے ساتھ ہمدردی کے اظہار اور ان کی ناقابلِ تصور آزمائش میں ممکنہ مدد کی ایک معمولی کوشش ہے۔
مسعود احمد قاضی نے جاں بحق افراد کے لیے دعائے مغفرت، زخمیوں کی جلد صحت یابی اور سوگوار خاندانوں کے لیے صبر، ہمت اور سکون کی دعا کی۔
رومانیہ کے سفارت خانے اور پشاور میں اعزازی قونصل خانے نے ریسکیو اہلکاروں، ڈاکٹروں، نرسوں اور اسپتال کے عملے کی خدمات کو بھی سراہا جنہوں نے سانحے کے بعد امدادی کارروائیوں میں حصہ لیا اور زخمیوں کو طبی امداد فراہم کی۔
رومانیہ کے سفارتی مشن نے متاثرہ خاندانوں اور پشاور کے عوام کے ساتھ یکجہتی کا اعادہ کرتے ہوئے امید ظاہر کی کہ کسی بھی برادری کو دوبارہ ایسی دردناک اور تباہ کن صورتِ حال کا سامنا نہ کرنا پڑے۔
