لاہور (ایم این این): وزیر اعلیٰ پنجاب مریم نواز کی لاہور کے شریف میڈیکل سٹی ہسپتال میں بڑی سرجری ہوئی ہے، جس کے بعد انہیں گھر منتقل کر دیا گیا۔
پنجاب کی سینئر وزیر مریم اورنگزیب نے جمعرات کو سوشل میڈیا پلیٹ فارم ایکس پر جاری اپنے بیان میں کہا کہ مریم نواز کی شریف میڈیکل سٹی ہسپتال میں بڑی سرجری ہوئی، جس کے بعد انہیں گھر منتقل کر دیا گیا۔
انہوں نے کہا کہ ہسپتال میں موجود ہونے کے باوجود وزیر اعلیٰ پنجاب نے عید کے پہلے روز صوبے میں سکیورٹی، صفائی اور دیگر انتظامی امور کی نگرانی جاری رکھی۔
مریم اورنگزیب کی پوسٹ پر ردعمل دیتے ہوئے وفاقی وزیر برائے انفارمیشن ٹیکنالوجی شزا فاطمہ خواجہ نے مریم نواز کی صحت اور جلد صحت یابی کے لیے دعا کی۔
قومی اسمبلی کے اسپیکر ایاز صادق نے بھی ان کی جلد صحت یابی کے لیے نیک خواہشات کا اظہار کیا۔ انہوں نے مریم نواز کی مستقل صحت، طاقت اور خیریت کے لیے دعا کرتے ہوئے دورانِ صحت یابی عوامی خدمت اور قیادت سے وابستگی کو بھی سراہا۔
