اسلام آباد (ایم این این): پاکستان بھر میں کروڑوں موبائل فون صارفین کو اب کالز، ایس ایم ایس اور انٹرنیٹ سروسز کے لیے زیادہ رقم ادا کرنا ہوگی، کیونکہ پاکستان ٹیلی کمیونیکیشن اتھارٹی (پی ٹی اے) نے مختلف ٹیلی کام کمپنیوں کی جانب سے پیش کیے گئے نئے ٹیرف پلانز کی منظوری دے دی ہے۔
نظرثانی شدہ ٹیرف شیٹس کے مطابق جاز، زونگ، یوفون اور دیگر موبائل آپریٹرز نے مختلف پری پیڈ اور پوسٹ پیڈ پیکجز کی قیمتوں میں 33 فیصد تک اضافہ کر دیا ہے، جبکہ سب سے زیادہ اضافہ ماہانہ اور طویل المدتی پیکجز میں کیا گیا ہے۔
نئے نرخوں کا اطلاق روزانہ، ہفتہ وار، پندرہ روزہ اور ماہانہ پیکجز پر ہوگا، جس کے باعث صارفین کو موبائل کالز، انٹرنیٹ ڈیٹا اور ایس ایم ایس سروسز کے لیے پہلے سے زیادہ ادائیگی کرنا پڑے گی۔
یہ اضافہ ایسے وقت میں سامنے آیا ہے جب ملک میں مہنگائی، بجلی، گیس اور دیگر بنیادی ضروریات کی قیمتوں میں مسلسل اضافے کے باعث عوام پہلے ہی شدید مالی دباؤ کا شکار ہیں۔
پی ٹی اے کے مطابق نئے ٹیرف کی تفصیلات شفافیت کو یقینی بنانے اور صارفین کو مختلف کمپنیوں کے پیکجز کا بآسانی موازنہ کرنے کے لیے جاری کی گئی ہیں تاکہ وہ اپنی ضرورت اور بجٹ کے مطابق مناسب پیکج کا انتخاب کر سکیں۔
ٹیلی کام شعبے کے ماہرین کا کہنا ہے کہ بجلی اور ایندھن کی بڑھتی قیمتوں، نیٹ ورک کی توسیع، اسپیکٹرم فیس، آپریشنل اخراجات اور مہنگائی کے باعث آپریٹرز وقتاً فوقتاً اپنے ٹیرف میں ردوبدل کرتے ہیں تاکہ سروس کے معیار کو برقرار رکھا جا سکے اور ڈیجیٹل انفراسٹرکچر میں سرمایہ کاری جاری رہے۔
پاکستان میں موبائل فون صارفین کی تعداد 19 کروڑ سے زائد ہے، جبکہ آن لائن تعلیم، فری لانسنگ، ای کامرس، ڈیجیٹل بینکاری، کاروباری سرگرمیوں اور روزمرہ رابطوں کے لیے موبائل انٹرنیٹ بنیادی ضرورت بن چکا ہے۔
دوسری جانب صارفین اور عوامی حلقوں نے ٹیرف میں اضافے پر تشویش کا اظہار کرتے ہوئے کہا ہے کہ اس فیصلے سے کم اور متوسط آمدنی والے طبقے پر مزید مالی بوجھ پڑے گا، جو سستی موبائل اور انٹرنیٹ سروسز پر انحصار کرتے ہیں۔
