لاہور (MNN)؛ پاکستان کرکٹ بورڈ (پی سی بی) نے انگلینڈ کے خلاف جاری ٹیسٹ سیریز میں مسلسل شکستوں کے بعد قومی ٹیسٹ اسکواڈ اور کوچنگ اسٹاف میں بڑے پیمانے پر تبدیلیوں کا اعلان کردیا ہے۔
یہ فیصلہ پاکستان کو لارڈز ٹیسٹ میں انگلینڈ کے ہاتھوں 194 رنز سے شکست کے بعد کیا گیا، جس کے ساتھ ہی میزبان ٹیم نے تین میچوں کی سیریز میں 2-0 کی ناقابل شکست برتری حاصل کرلی۔
پاکستان کو پہلے ٹیسٹ میں بھی ہیڈنگلے کے مقام پر ایک اننگز اور 103 رنز سے شکست کا سامنا کرنا پڑا تھا۔
سات کھلاڑی اسکواڈ سے ریلیز
پی سی بی نے قومی ٹیسٹ اسکواڈ سے سات کھلاڑیوں کو ریلیز کردیا ہے، جن میں وکٹ کیپر بیٹر محمد رضوان، اوپنر امام الحق اور آل راؤنڈر سلمان علی آغا شامل ہیں۔
اسکواڈ سے ریلیز کیے جانے والے دیگر کھلاڑیوں میں علی عثمان، عامر جمال، محمد اویس ظفر اور خرم شہزاد شامل ہیں۔
ان کھلاڑیوں کی جگہ پی سی بی نے سات نئے کھلاڑیوں کو اسکواڈ میں شامل کیا ہے، جن میں پانچ ایسے کھلاڑی شامل ہیں جنہوں نے ابھی تک ٹیسٹ کرکٹ میں پاکستان کی نمائندگی نہیں کی۔
نئے کھلاڑیوں کو موقع
ٹیسٹ کرکٹ میں تجربہ رکھنے والے صائم ایوب اور عبداللہ فضل کو دوبارہ قومی ٹیسٹ اسکواڈ میں شامل کرلیا گیا ہے۔
صائم ایوب آٹھ جبکہ عبداللہ فضل دو ٹیسٹ میچوں میں پاکستان کی نمائندگی کرچکے ہیں۔
ٹیسٹ کرکٹ میں پہلی مرتبہ شامل کیے جانے والے کھلاڑیوں میں بائیں ہاتھ کے اسپن آل راؤنڈر عرفات منہاس، بائیں ہاتھ کے فاسٹ بولر محمد عمران جونیئر، وکٹ کیپر بیٹر سعد بیگ اور رائٹ آرم پیس آل راؤنڈرز محمد عمران المعروف عمران رندھاوا اور رضا اللہ شامل ہیں۔
عرفات منہاس پاکستان کی جانب سے تین ون ڈے اور چار ٹی ٹوئنٹی انٹرنیشنل میچ کھیل چکے ہیں۔
وکٹ کیپر بیٹر سعد بیگ کو 2025-26 قائداعظم ٹرافی کا بہترین کھلاڑی قرار دیا گیا تھا۔
تمام نئے منتخب کھلاڑی انگلینڈ کے خلاف تیسرے اور آخری ٹیسٹ سے قبل قومی اسکواڈ کو جوائن کریں گے۔
سیریز کا آخری ٹیسٹ 9 ستمبر سے برمنگھم میں کھیلا جائے گا۔
کوچنگ اسٹاف میں بھی تبدیلیاں
پی سی بی نے ٹیسٹ ٹیم کے کوچنگ اسٹاف میں بھی اہم تبدیلیاں کردی ہیں۔
ٹیسٹ ٹیم کے ہیڈ کوچ سرفراز احمد اور بولنگ کوچ عمر گل کو ان کی ذمہ داریوں سے فارغ کردیا گیا ہے۔
پی سی بی کے مطابق وائٹ بال ٹیم کے ہیڈ کوچ مائیک ہیسن اور ایشلے نوفکے کو ٹیسٹ ٹیم کے بیک روم اسٹاف میں شامل کیا جائے گا۔
ان تبدیلیوں کو پاکستان کی ٹیسٹ ٹیم میں ایک بڑی تنظیم نو قرار دیا جا رہا ہے کیونکہ قومی ٹیم سیریز کے آخری میچ میں وائٹ واش سے بچنے کی کوشش کرے گی۔
برمنگھم ٹیسٹ کے لیے پاکستان کا نیا اسکواڈ
بابر اعظم (کپتان)، عبداللہ فضل، عرفات منہاس، اذان اویس، محمد عباس، محمد علی، محمد عمران، محمد عمران جونیئر، محمد غازی غوری (وکٹ کیپر)، رضا اللہ، سعد بیگ (وکٹ کیپر)، صائم ایوب، ساجد خان، سعود شکیل، شان مسعود اور عبید شاہ۔
انگلینڈ اور پاکستان کے درمیان تیسرا اور آخری ٹیسٹ ایجبسٹن، برمنگھم میں کھیلا جائے گا، جہاں پاکستان سیریز میں اپنی پہلی فتح حاصل کرنے اور وائٹ واش سے بچنے کی کوشش کرے گا۔
