اسلام آباد/راولپنڈی (ایم این این): وزیراعظم شہباز شریف اور انور ابراہیم کا دوطرفہ تعلقات و علاقائی امن پر تبادلہ خیال، ملائیشین وزیر داخلہ کی وزیراعظم اور فیلڈ مارشل عاصم منیر سے ملاقاتیں
پاکستان اور ملائیشیا نے تجارت، سرمایہ کاری، سیکیورٹی اور دفاع سمیت مختلف شعبوں میں دوطرفہ تعاون مزید مستحکم کرنے کے عزم کا اعادہ کیا ہے۔ اس سلسلے میں وزیراعظم محمد شہباز شریف نے ملائیشیا کے وزیراعظم داتو سری انور بن ابراہیم سے ٹیلی فون پر گفتگو کی، جبکہ ملائیشیا کے وزیر داخلہ داتو سری سیف الدین نسوتیون اسماعیل نے وزیراعظم شہباز شریف اور چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر سے الگ الگ ملاقاتیں کیں۔
وزیراعظم شہباز شریف نے ٹیلی فونک گفتگو کے دوران ملائیشین وزیراعظم انور ابراہیم کی خیریت دریافت کی اور ان کی جلد اور مکمل صحت یابی کے لیے نیک خواہشات کا اظہار کیا۔
دونوں رہنماؤں نے پاکستان اور ملائیشیا کے درمیان دوطرفہ تعاون کی موجودہ مثبت پیش رفت پر اطمینان کا اظہار کرتے ہوئے بالخصوص باہمی تجارت اور سرمایہ کاری کے روابط کو مزید فروغ دینے کے عزم کا اعادہ کیا۔
گفتگو کے دوران علاقائی صورتحال، بالخصوص خلیج اور مشرق وسطیٰ کی صورتحال پر بھی تبادلہ خیال کیا گیا۔ ملائیشین وزیراعظم نے علاقائی امن کے لیے پاکستان کی کوششوں کو سراہا اور وزیراعظم شہباز شریف اور فیلڈ مارشل سید عاصم منیر کی قیادت اور امن کے لیے کاوشوں کو قابل تحسین قرار دیا۔
وزیراعظم شہباز شریف نے علاقائی امن کے لیے پاکستان کی کوششوں کی مسلسل حمایت پر اپنے ملائیشین ہم منصب کا شکریہ ادا کیا اور کہا کہ پاکستان، ملائیشیا اور دیگر برادر و دوست ممالک کے ساتھ مل کر بالخصوص مشرق وسطیٰ میں پائیدار امن کے قیام کے لیے اپنی کوششیں جاری رکھے گا۔
دونوں وزرائے اعظم نے مستقبل قریب میں باہمی طور پر موزوں موقع پر ملاقات کرنے پر اتفاق کیا۔ وزیراعظم شہباز شریف نے داتو سری انور ابراہیم کو ان کی سہولت کے مطابق جلد پاکستان کے سرکاری دورے کی دعوت بھی دہرائی۔
دریں اثنا، ملائیشیا کے وزیر داخلہ داتو سری سیف الدین نسوتیون اسماعیل نے ملائیشین سفیر اور اعلیٰ سطحی وفد کے ہمراہ وزیراعظم ہاؤس اسلام آباد میں وزیراعظم شہباز شریف سے ملاقات کی۔
وزیراعظم نے ملائیشین وزیر داخلہ کا خیرمقدم کرتے ہوئے دونوں ممالک کے قریبی اور برادرانہ تعلقات کو تمام شعبوں میں مزید مضبوط بنانے کے عزم کا اعادہ کیا۔ ملاقات میں بالخصوص سیکیورٹی، قانون نافذ کرنے والے اداروں، تجارت اور سرمایہ کاری کے شعبوں میں تعاون بڑھانے پر زور دیا گیا۔
ملاقات کے دوران علاقائی صورتحال اور امن و استحکام کے لیے جاری کوششوں پر بھی تبادلہ خیال ہوا۔ ملائیشین وزیر داخلہ نے وزیراعظم انور ابراہیم کی جانب سے وزیراعظم شہباز شریف کے لیے نیک تمناؤں کا پیغام پہنچایا اور پاکستان کے ساتھ مضبوط تعلقات کو مزید مستحکم کرنے میں ملائیشیا کی گہری دلچسپی کا اظہار کیا۔
اس موقع پر پاکستان اور ملائیشیا کے درمیان سزایافتہ افراد کی منتقلی کے معاہدے پر دستخط کی تقریب بھی منعقد ہوئی، جس میں ملائیشیا کے وزیر داخلہ داتو سری سیف الدین نسوتیون اسماعیل اور پاکستان کے وفاقی وزیر داخلہ سید محسن رضا نقوی نے معاہدے پر دستخط کیے۔
علاوہ ازیں، ملائیشین وزیر داخلہ، ملائیشیا کے سفیر اور اعلیٰ سطحی وفد نے جنرل ہیڈکوارٹرز (جی ایچ کیو) راولپنڈی میں فیلڈ مارشل سید عاصم منیر، نشانِ امتیاز (ملٹری)، ہلالِ جرأت، چیف آف آرمی اسٹاف اور چیف آف ڈیفنس فورسز سے ملاقات کی۔
ملاقات میں علاقائی سیکیورٹی کی صورتحال اور باہمی دلچسپی کے امور پر تفصیلی تبادلہ خیال کیا گیا۔ دونوں جانب سے پاکستان اور ملائیشیا کے مضبوط اور دیرینہ تعلقات کو مزید وسعت دینے اور مشترکہ دلچسپی کے شعبوں میں تعاون بڑھانے کے عزم کا اظہار کیا گیا۔
فیلڈ مارشل سید عاصم منیر نے ملائیشیا کے ساتھ دفاعی تعاون اور اسٹریٹجک روابط کو مزید گہرا کرنے کے لیے پاکستان کے عزم کا اعادہ کیا۔
ان اعلیٰ سطحی رابطوں اور ملاقاتوں نے پاکستان اور ملائیشیا کے درمیان بڑھتے ہوئے تعلقات کی عکاسی کی ہے، جہاں دونوں ممالک نے اقتصادی، تجارتی، سیکیورٹی، قانون نافذ کرنے والے اداروں اور دفاعی شعبوں میں تعاون بڑھانے کے ساتھ ساتھ علاقائی امن اور استحکام کے لیے قریبی مشاورت جاری رکھنے پر اتفاق کیا ہے۔
